Relatos

Las mulas de Vallònga

¡Hay nina! no sabes lo que va pasá el atro día. Conta-me , conta-me que m’estigo ya sulsin. Pues mira, estaba esperan el auto de línea que baixa de Peralta a que llega-se, pues teniba que visita-me a Huesca para que me operen de la garra dreta que la tingo mol mala , pues axi mel va aconseja el dotó del llugá, y mira per agón de pronto, allá apartat se sentiban las campanetas de las mulas, que salliban coma toz els días, pronto pel maitino de casa Vallònga , pa aná a defòra y empezá a llaurá en el tèrme. Y como si ha-se sito, una aparició van saldré del puente correns cara entalto una rabosa y detrás la veniban acometén un montó de cochos que no paraban de ñaulá ¡Una escandalera! No tel poz imaginá. Èba tan forta que se van dixá de sentí las campanetas de las mulas y coma èba encara de nit , a lo primèro no sabeba el que pasaba. Total que se van cruza astí a la revuelta dels abreurados las mulas, con la rabosa y el cochos y ¡se va arma una! que no tel poz imagina. ¡Madre mía! ,¡ Qué barbaridad! , ¿ Pués sí que se va forma gorda.? ¿ Y que més va pasá? Mira, aquellas mulas van empezá a pega botes y a corré de dos en dos pues anabán chuntas pilladas con el chou y els mozos detrás de ellas corren, renegán y pegán gritos sin pará bueno, bueno. Las ventanas y els balcóns se ubriban con el soroll dels ferrolls y els ventanicos que se anabán ubrin pa vèr lo que pasaba al carré ,y aunque èba ivert y estaba chelán, las donas se asomabán y se dibán unas a las atrás, ¿ Que está pasán nina? El estrapalucio èba tan gran que hasta els críos se van despertá , pa ells ixo les pareixeba una fèsta de las grans y axí la van viure. Al final las bestias van empendre a corre per la carretèra cara enta la èra Caretes y la Pllana de Cozme. Uns parells de mulas se van pará per allí y otras las van trova al cruce tranquilament minchán. Al final el mozos van chuntá a todas las mulas, pues en ñ’habèba sis parells que van saldré pa llaurá , y s’en van torná car’als corralls pa explica-li al moyoral lo que hèba pasau y al mateix tiempo arreglá els aparejos pa torná a saldré a defòra ya que s’anaban a llaurá als Alitos. Els comentarios que ñ’habèba per las tiendas y en els roldes de la pllaza no se parllaba de otra cosa que d’el caso de las mulas y de la rabosa. Per la nit al café alguns mozos s’en jodeban con grans risas contan lo que les hèba pasau al mozos de Vallonga, que com tos podez imagina, ixe día no s’els va vèr el pelo per ningún costat, pues estaban avergoñiz per no pòdre controlá a las mulas en una situación coma aquella, pues siempre hèban presumiu de seá mòl pinchos. Este aconteciment no va dixa de comentase hasta que a la semana siguiente en va pasa un atro ,que bueno, ya tol contaré, y tamé se va armá gorda ,pues van llega al llugá uns carromatos de húngaros que fèban circo y llebaban un onso que se les va escapá. Bueno hasta otro rato. Azanuy. Diez y òcho de Noviembre de 2011 El Ferruz

Als llavadós

Tos voigo a contá algo que me'l van dí el atro día als llavados, ñ’habeba un montó de dònas llavan uns vellons, que per cièrto en ñ'habeba de bllancos y de nègros, qui diban èban del Almuniero ,pues crego que fèba uns dias que habian chollau las ovellas del ramat que tienen.

Pués còma tos diba, resulta que el siño Toñet , aquell que viu all’alto al cabo llugá , se va caure de la somèra y se va esllomá. Lo malo me van di que le va pasa  defòra y el pobre hòme no se'n podeba aná en ta casa ,pues no teniba forzas pa puya-se-ne a la somèra,.

Le contaba a la dòna que'll va intentá tot , se'n va puyá a una espona còma va podré y desde alli va querí monta-se ,pero mira per agón, chusto en ixe instante, Be-te-me tu que la somèra va arrancá a corré .

Ya tos podez imaginá al siño Toñet, uns renecs , van sè tantos y tan altos, que van llega a senti-se hasta casi el llugá , y mira per agón, ixo el va salvá, pues el va sentí el chove de Fermín que estaba cullín armellas asti al Ferruz y hie va acudí enseguida correns.

Mira ,en cuanto el siño Toñet el va vèr ,va pensá que se le había aparexiu la Virgen.

Ramonet, que axí se diba el chove Fermín , enseguida le va preguntá ¿ Qué l'ha pasau ? Cuan el va vèr llargo a tèrra cóma un salamandran sin pode-se mòure.

Ay nino, ixa carnuz de somèra que se ha espantau, puès ha salliu un conill de asti de ixas matas a tèrra y al vèr-lo ha pegau un bote y me ha jodiu al suelo . Total que me he queriu encaramá encima de la colchoneta , puyan-me a una espona, y ha sito pió el remeí que la enfermedad , la soméra h'apretau a corré , y còm no m'hèba  agarrau pròu bèn , me ha tirau otra vegada a tèrra y encima he caiu del atro costat, ya veus ,no me puedo mòure pa rés.

Ramonet ,le va dí al siño Toñet , mire quede-se astí tranquilo, que yo me acerco al llugá a busca el carro y alguno trovaré que vinga a ayuda-me a puya-lo al carro pa lleva-lo al dotó , el cure y vèiga lo que le ha pasau.

Al rato, va vindre Ramonet con el fillo gran de Rastilladó ,y con mòlto cuidau el van estendre sobre una márfega que èban posau encima del carro.

Van aná pòco a pòco per el camino de Penallada pero fèba cuatre dias que había plloviu y estaba pllieno de rodèras y basals de aigua. Aquell carro se moveba mes que la pèdra del molino cuán estaba machacan las olivas. Total que el siño Toñet no paraba de chemecá y de renegá hasta que van llegá a casa del mèdico .

Van truca a la pòrta y al instante va baixa la suya dòna, espantada per las trucadas tan fortas que había fèito el chove Fermín.

¿ Qué pasa? va pregunta .

Mire siña María , que així se diba la dòna del mèdico , le portan al siño Toñet pa que el vèiga su marido, pués se ha caiu de la somèra y pensan que s’ha fèito molto mal per dintro.

Au, pués puyaz-lo en ta'lto y estiraz-lo en ixa camilla que ñ'hey posat un llinzol llimpio, y així el van fè.

Va resultà que el dotó no hi’estaba perque había anau atendre al siño Pèdro que teniba una malentia que le diban las fiebres malta y le posaba una inyección cada día per las tardes.

El seño Toñet no paraba de chemecá y de renegá, pues crego que no sen donabá cuenta agón estaba.

La siña María le diba ¿ Per el amor de Dios, siño Toñet , com diu ixas barbaridaz?

Mire, no me'nn faga caso ,pués no se lo que me digo.

Al cabo del rato va llegá Don Joaquín que èba el mèdico, y pareix que con solament vèr-lo se le van pasá toz el mals.

Bueno, pues ixo tos conto, lo que va pasá el atro día.

El mal que se va fè el siño Toñet no el sé, per que ninguno ha dito rés, si m'entero ya tol diré.

Uy, ¿ Hez visto que hora se mos ha fèito? Ñ’habrá que ana-se-ne pa fè el disná.

Bueno ninas, ya quedarem pa'tro rato.

Adios m'en voigo.

Azanuy . Cuatre de Octubre del 2011

El Ferruz.

Páginas

http://www.grenzdenkmaeler.de/essay-on-a-good-teacher/